TEHERAN, IRAN, AP.- Kompania petrolero di Iran a ofresé djaluna 50 kampo di gas i petrolio na empresanan internashonal. Promé be ku e empresa estatal ta hasi esaki despues ku aña pasá e empresa a yega na un akuerdo ku potensia internashonal pa limitá su programa nuklear.
Tambe djaluna, e vise promé minister di petrolio Amir Hossein Zamanina a alegá un akuerdo preliminar di paisnan di Organisashon di Paisnan Eksportá di Petrolio (OPEP) pa limitá e produkshon na 32,5 mion I 33 mion di bari pa dia.
E akuerdo di OPEP lo alkansá na final di òktober i lo tin ophetivo pa redusí un produkshon mundial ku a baha e preisnan den krudo durante añanan. Zamaninia a bisa ku e periodistanan na Teheran ku e akuerdo “tabata un paso chikí pero den bon direkshon”.
Iran a trata di restablesé si industria petrolero for di dia a retirá e sanshonnan internashonal ku tabata pasa riba e pais debí na su programa nuklear. Iran, ku un produkshon di 3,85 mion di bari pa dia, den un inisio a bisa ku solamente lo konsiderá un dak despues di alkansá 4 mion bari pa dia, e nivel ku tabatin promé ku e sanshon.Miéntras e minister di petrolio a anunsiá djadumingu ku pa promé bes lo invitá empresanan estranhero pa presentá un oferta pa proyektonan di gas i petrolio. Djaluna e ministerio a duna di konosé detayenan, bisando ku esaki lo inkluí 29 kampo di petrolio i 21 di gas.
E agensia a bisa e empresanan estranhero ku nan tin te ku 19 di novèmber pa presentá nan solisitutnan i e kompanianan ganadó lo keda anunsiá dia 7 di desèmber. Anteriormente, Teheran a bisa ku e paisnan ku ta kompartí frontera tin prioridat pa eksplotashon i produkshon.
E gobièrnu ta spera di atraé mas di 150.000 mion dòler na invershon estranhero pa su sektor petrolero, di gas i petrokímiko pa aña 2020.
