HERUSALEM, AP.- Israel a lansa un misil Patriot djárason kontra un avion no tripulá ku a drenta su espasio aéreo desde Siria. E pais a atvertí ku lo no tolerá infiltrashonnan aéreo ku a ripití vários biaha durante aña.
E mando militar a bisa ku e misil a interseptá e avion “ku a infiltrá e frontera israelí desde Siria”. Nan no a duna informashon di víktimanan òf daño. Polis a emití un aviso inusual na botonan riba laman di Galilea pa nan regresá na kantu “debí na operashonnan di seguridat den kurso den e zona”.
Nan no a drenta den detaye, pero mando militar a atvertí ku “lo no permití ningun violashon den e espasio aéreo israelí i lo enfrentá kualkier intento di ataká su sivilnan”.
No tabata evidente ken a lansa e drone. Un luna pasá tabatin un insidente similar i den febrüari Israel a ataká un drone ku nan a sigurá di tabata di Iran i ku esaki a drenta su espasio aéreo.
E promé minister israelí, Benjamin Netanyahu, tabata na Moscow pa kòmbersashonnan tokante Siria ku e presidente ruso Vladimir Putin, un aliado krusial di e presidente sirio, Bashar Assad, den e guera sivil sirio.
