PALESTINA (AFP).- Israel a asumí responsabilidat pa un bombardeo di djaluna ku a mata shete trahadó humanitario ku tabata parti kuminda den Gaza, pero a sigurá ku ta trata di un insidente no intenshonal i a primintí di lo hasi un investigashon.
E organisashon World Central Kitchen (WCK) dje chef spañó-norteamerikano José Andrés, pa kua e víktimanan dje bombardeo tabata traha, a anunsiá e suspenshon di su akshonnan den e teritorio palestino.
E víktimanan tabata di Australia, Polonia, Reino Uní, unu ku dòbel nashonalidat di Merka i Canada, i Palestina, segun WCK, un dje poko organisashonnan presente den Gaza despues di kasi seis luna di guera entre Israel i e movementu islamita Hamás.
“Lamentablemente ayera un aksidente trágiko a tuma lugá ora ku nos forsanan a ataká di forma no intenshonal hendenan inosente den Gaza”, segun e promé minister israelí Benjamin Netanyahu.
“Ta kosnan ku ta pasa den guera…. nos ta den kontakto ku e gobièrnunan i lo hasi tur loke ta posibel pa e kos aki no ripití”, segun el a agregá, refiriendo na e atake riba Deir al Balah, den sentro di Gaza.
E restunan dje víktimanan a keda hibá na un hòspital di e siudat ei, kaminda un koresponsal di AFP a mira sinku kurpa. Imágennan di AFP a mustra kadaver di un dje víktimanan, ku tabatin suèter pretu ku e logo dje organisashon. Riba un otro potrèt por mira un vehíkulo di mesun organisashon ku dak borá.
Merka, prinsipal aliado di Israel, a eksigí un investigashon “lihé i imparsial” riba e suseso, segun sekretario di estado Antony Blinken.
White House ta rabiá i a indiká di lo manda “un mensahe bon kla pa Israel ku mester protehá esnan ku ta duna yudansa”.
