MILAN, AP.- Un bayendo di 8 meter largu a wòrdu deskubrí morto na kosta di Italia ku 22 kilo di plèstik den su barika. Esaki a pone ku World Wildlife Foundation a bati alarma djaluna riba shushi den laman Mediteráneo.
E organisashon defensor di medio ambiente ku e shushi rekuperá den stoma di e bayena ta kontené un tubu a ehersé trabounan eléktriko, tayónan di plèstik, saku di supermerkado, retnan di peska i un paki di detergente.
E bayena a yega na kosta nort di Sardinia siman pasá, den un santuario marina Pelagos, kreá spesialmente komo un refugio pa dòlfein, bayena i otro bida marina.
E biólogo Cinizia Centelegghe, di Universidat di Padova, a bisa ku “ta promé biaha ku nos ta topa ku un animal ku e kantidat grandi aki di shushi”, segun korant La Stampa.
E eksámen a determiná ku e bayena tabatin un feto morto den estado avansá di deskomposishon. Ekspertonan ta bisa ku e bayena no tabata por a digerí su kuminda debí na e gran kantidat di plèstik ku el a ingerí i kual tabata okupá dos terser parti di su stoma.
WWF a bisa ku plèstik ta un di e menasanan prinsipal di bida marina i den último dos añanan, esaki a mata por lo ménos sinku bayena ku a ingerí esaki den gran kantidat den lamannan di Europa i Asia.
