CALIFORNIA, AFP.- Míles di persona a laga nan kas den e bario di Napaen na California debí na kandela ku ta destruyendo kasnan ku gran velosidat i sofokando e parti aki di Merka mundialmente famoso pa su biña.
Bou di un shelu oraño i un ola di kalor sofokante, e vlamnan ta konsumí e plantashonnan di drùif (biña). E kandela a bai segun un ritmo di propagashon kimando algun 4500 hèktar te ku djaluna último, asina e departamento di mondi i protekshon kontra kandela di California (CalFire) a bisa.
Entre e plantashonnan afektá tin esun di Chateau Boswell Winery di Santa Helena i parti di Castello di Amorosa, di arkitektura medieval, miéntras tin otronan tambe ta keda menasá pa e kandela.
“Nos a logra salba un bodega ayera nochi, pero tur sobrá kos a bai pèrdí”, asina Tuck Bachstoffer presidente di un di e plantashonnan/fábrika di 8 hèktar di Santa Helena a bisa.
Cee Bee Thompson a pasa su anochi mirando kon kandela di leu tabata kana miéntras e sirena di atvertensia tabata zona i kandela tabata pasa dor di e plantashonnan. El a bisa ku úniko kos ku nan por a hasi ta pone e pushinan den outo i bai for di einan.
