JACKSON, MERKA, AFP.- Un total di 35 persona a muri na Kentucky pa motibu di inundashonnan ku a afektá e estado, e situashon ta kompliká pa operashonnan di limpiesa, búskeda i reskate.
E gobernador di e estado di Merka a anunsiá e mortonan adishonal. El a añadí ku posiblemente e kantidat di mortonan lo sigui oumentá pa motibu ku ekiponan di búskeda i reskate no a wòrdu desplegá den gran parti di e zona afektá, pa motibu di áwaseru fuerte djaluna.
Algun zona na ost di Kentucky a akumulá mas ku 20 centimeter di áwaseru den 24 ora siman pasá, kual a provoká e inundashonnan repentino. Sierto parti den e region montañoso di Apalaches ainda ta inaksesibel despues di e inundashonnan.
Presidente Joe Biden a emití un deklarashon di katástrofe pa e estado, pa yudansa federal komplementá esfuersonan di rekuperashon estatal i lokal.
