MOSKU (AFP).- E balansa dje atentado den un sala di konsierto di Mòsku a subi na 143 morto, segun sifra nobo anunsiá ayera pa outoridatnan ruso.
E atake, reklamá di parti dje grupo Estado Islámiko, a tuma lugá djabièrnè anochi den e sala di konsierto Crocus City Hall, un suburbio di Krasnogorsk.
E minister ruso di salú, Mijail Murashko, a bisa ku ainda tin 80 hende den hòspital, di kua seis ta mucha. E kuater sospechosonan outor dje atentado ta den detenshon provishonal i otro sospechonan a keda detené.
Ta trata dje atake ku mas tantu morto dje organisashon EI na Europa, pero outoridatnan ruso ta insistí pa buska un pista for di Ukrania. Kiev ta nenga e akusashonnan ei.
E presidente ruso, Vladimir Putin, djaluna a rekonosé pa promé biaha ku e atentado a keda kometé di i di islamitanan radikal, pero a insinuá atrobe ku nan por tin algun relashon ku Ukrania.
