PARIS (AFP).- Un tribunal franses den apelashon a kondená e eks-komandante rebelde de Liberia Kuntu Kamara na 30 aña di prizòn pa violensia kontra di sivilnan i komplisidat den krímennan kontra di humanidat durante e promé guera sivil di e pais afrikano.
Kamara, di 49 aña, a keda kondená na bida largu den un promé huisio ku a tuma lugá na Paris den 2022. E sentensia di ayera ta resultado di un proseso di apelashon.
E tribunal a rekonosé ku Kámara ta kulpabel di un serie di “aktonan inhumano di tortura i barbaridat kontra di sivilnan entre 1993 i 1994, e.o. di a torturá i mata un profesor i supuestamente a kome su kurason.”
E tribunal tambe a rekonosé ku e ta kulpabel di komplisidat di krímennan pa no a impedí ku dos sòldá bou di su outoridat na vários okashon ku a violá dos dama den 1994.
Kamara, detené na Fransia for di 2018, tabata komandante regional di e Movementu Uní di Liberashon di Liberia pa Demokrasia, un grupo rebelde ku a lucha kontra Frente Patriótiko Nashonal dje presidente di e tempu ei, Charles Taylor.
Liberia, den wèst di Afrika tabata esenario di dos sangriente guera sivil (1989-1996 / 1999-2003). E konfliktonan a laga 250.000 morto i miónes di hende ku mester a hui for di nan kas, den un dje paisnan mas pober di planeta.
