CARACAS (AP).- Un kantidat grandi di aktivista na Venezuela ku oponentenan na gobièrnu ta konsiderá komo prezunan polítiko a ser lagá den libertat for di prizòn djabièrnè. Outoridatnan a duna di konosé ku esaki ta un gesto den un intento pa uni e pais ku ya ta frágil. Meimei di e 39 prezunan ku a ser poné den libertat pero bou di kondishonnan masha estrikto tin e èks mayor Daniel Ceballos kende a keda detené durante kuater aña pa a promové protestanan den e siudat di San Cristobal, di akuerdo ku Korte Supremo venezolano.
Delcy Rodriguez, presidente di e Asamblea Nashonal Konstituyente, a duna di konosé ku esaki ta e promé grupo di prezu ku ta ser liberá i a primintí ku lo bai tin mas. Presidente Nicolás Maduro a duna di konosé despues di su reelekshon dia 20 di mei último ku un di e medidanan di rekonsiliashon ta pa liberá un kantidat di persona ku a keda enkarselá pa aktonan kontra gobièrnu. Venezuela ta kla pa un diálogo franko, sinsero i konstruktivo, asina Maduro a bisa den un Tweet djabièrnè mainta promé ku e anunsio di liberashon dje prezunan. “Portanan ta habrí pa esnan ku a skohe e kaminda di pas i rekonsiliashon”, segun e presidente.
E punto dje prezunan polítiko a keda komo un faktor ku ta pisa den e deliberashonnan, i e lider di oposishon Laidy Gomez a duna di konosé ku e diskushonnan ku Maduro un dia promé tabata pa terminá e persekushonnan polítiko den e pais. Maduro a duna instrukshon pa laga un kantidat di prezu liber, pero a ekskluí esnan ku ta será i akusá di homisidio.
