WASHINGTON (AP).- E desishon di e atministrashon di Trump pa subi tarifanan pa importashon di aluminio i heru riba su aliadonan prinsipal ta algu ku lo por debilitá komersio i tambe e posishon dje Sekretario di Komersio (Wilbur Ross) den e gobièrnu Trump, miéntras ku esaki ta biahando pa Beijing pa trata di kalma un guera na China. Esei a lo ménos ta e opinion di hopi analista di ekonómiko di hopi tempu i tambe esnan ku ta sigui desaroyonan na China.
“Esaki realmente ta algu kaminda Merka ta bayendo un bataya riba su so”, asina Philip Levy, un konsehero di komersio den e atministrashon di George W. Bush a duna di konosé. “Dor di ataká nos aliadonan, nos ta keda pará sin protekshon i solitario di un manera ku nunka nos tabata promé”.
E problema ta ku Merka n’e momentunan aki ta koriendo ku tur su amigu i partnernan na un momentu ku realmente e lo por a usa nan sosten.
Despues di a informá reporteronan di e desishon di gobièrnu pa hisa tarifanan riba importashon di heru for di Canada, Mexico i tambe Union Europeo, Ross a sali pa Beijing pa negosiashon den un intento pa resolvé e disputa riba e intentonan agresivo di parti di China pa reta e supremasia teknológiko di Merka.
Analistanan ta bisa ku defakto e tim di Trump lo mester a traha un lista di su aliadonan uní pa konfrontá China. Pero amigunan di Merka manera Hapon i Union Europeo ta riba e mesun liña ku Merka. Nan no ta di akuerdo ku e sistema di hòrta propiedat intelektual di parti di China ni esaki su sobre-produkshon ku a inundá merkado mundial ku heru i aluminio barata.
