MIAMI, AP.- E kantidat di kubano kapturá riba laman ganchu purbando di yega kostanan merikano a krese apesar di e mehorashon di relashon entre e dos paisnan. Asina Wardakosta di Merka a indiká djabièrnè.
Den un komunikado, servisio di wardakosta a informá ku a kapturá 7.358 kubano den e aña fiskal ku ta terminá djabièrnè. Esaki ta konstituí di un oumento di 65% kompará ku 4.473 kapturá aña pasá. Tabatin un oumento den e kantidat di kubano ku a purba emigrá den e dos último añanan. Nan ta teme ku pronto lo pone fin na e polítika merikano di kual ta permití kubanonan ku ta yega riba su teritorio pa keda. Pero ta debolbé esnan ku wòrdu kapturá riba laman.
Wardakosta a informá ku 232 kubano a wòrdu repatriá desde 22 di sèptèmber.
Outoridatnan a atvertí ku e presensia di orkan Matthew den Karibe ta impliká un peliger mas grandi pa kubanonan ku ta purba pasa via laman den botonan inflabel.
