MEXICO, AFP.- Korte Supremo di Mexico a deklará djamars ku ta inkonstitushonal pa kastigá aborto den un votamentu unánime ku ta habri porta pa muhénan rònt mundu haña akseso na e prosedimentu aki.
“Ku e kriterio unánime aki, no por kondená un hende muhé ku ehersé su derechi di aborto”, segun indikashon di e presidente di korte, hues Arturo Zaldivar.
Un fuente hudisial a splika ku e sentensia tin alkanse nashonal. Muhénan ku ta biba den estadonan kaminda aborto no ta legal tambe por haña akseso na e servisio ku òrdu di un hues.
Un efekto mas di e resolushon aki ta ku muhénan enkarselá pa aborto lo rekobrá nan libertat.
Mexico ta un pais kaminda estadonan por dikta nan propio leinan, pero esaki por wòrdu imbalidá ku òrdu di Korte Supremo.
Aborto ta legal te ku e di 12 siman di embaraso desde 2007 den Siudat di Mexico. Oaxaca, Veracruz i Hidalgo tambe ta permití aborto te ku e di 12 siman di embaraso.
