BOGOTA, AP.- Kunukeronan, indigenanan, studiantenan, víktimanan i siudadanonan komun a marcha ayera den diferente siudat di Colombia gritando “akuerdo firmá, akuerdo respetá”, pa asina duna balor na e pakto di pas entre gobièrnu i FARC ku a keda rechasá algun despues pa medio di e referendum “plebisito”.
“Nos tur ta víktima di e mesun konflikto”, asina Johana Dagua di 32 aña un indígena di Corinto a bisa. Ta trata aki di un di e zonanan mas gòlpiá pa e enfrentamentunan entre gueria i ehérsito. El a bisa esaki miéntras e tabata kana direkshon pa sentro di Bogotá. E siudadanonan tabata spera e yegada di víktimanan i tabata bai entregá esakinan flor, margarita i klabel blanku na nòmber di pas i traha un koredor humano te ku e plasa di Bolivar.
Diana Gomez di 38 aña tabatin un bòrchi den man ku mas di 100 potrèt di morto i hendenan desaparesé na man di krímennan di estado segun e ta denunsiá.
“E víktimanan ta na peliger, nos mester di un akuerdo awor”, asina e yu di un aktivista asesiná i desaparesé for di 2006 a bisa. E kaso aki parse tin 10 aña wantá serka Fiskalia. E universitarionan, un di esnan kolektivo ku mas a pusha e mobilisashon pa e akuerdo di pas a pèrdè apoyo di siudadanonan den e plebisito di dia 2 di òktober pa ménos di mei punto di porshento i ku mas di 60% di apstenshon, i awor a risibí e apoyo di e rektonan di e sentronan públiko i privá, ku a invitá e studiantenan pa uni na e marcha.
