BUENOS AIRES, AP.- E gobièrnu argentino a anunsiá djaweps ku a konfiská 1.000 arma i shen eksplosivo. Esaki ta e konfiskashon “mas grandi den historia”. Aparte di esaki Merka a yuda outoridat argentino desmantelá e gang internashonal ku tabata trafiká e armanan.
Aparte di e armanan, outoridat a konfiská un kantidat di bòm pa avion, aluminio den forma di polvo i bolanan di heru entre otro.
E komunikado no a indiká ken mester a risibí e karga di arma aki.
E minister di seguridat, Patricia Bullrich a informá na medionan di prensa ku e arsenal di guera konfiská tin un balor di 250 mion dòler i ku ainda mester habri un bunker ku arma wardá den esaki. E armanan aki a bini for di Merka i Europa ku destino pa Brasil via Paraguay.
