WASHINGTON, AP. – Kongreso a voto ayera di forma abrumador na fabor di permití e famianan di víktimanan di atakenan terorista di 11 sèptèmber 2001 pa demanda Arabia Saudi bou di akusashonnan di ku el a respaldá e atakantenan, dunando asina na presidente Barack Obama su promé anulashon di veto di su presidensia.
Tantu e kámara di representante komo senado a vota di forma desisivo na fabor pa anulá e intento di presidente Barack Obama di blòkia e inisiativa di lei. E demókratanan den tur dos kámara a bandoná di forma masal e presidente, apesar di e atvertensia di Obama i funshonarionan haltu di seguridat nashonal di ku e lei por pone na rísiko e interes, sòldánan i personal di inteligensia merikano.
E votashon di Senado tabata di 97-1. Algun ora promé e kámara a vota 348- 77. E legisladónan a bisa ku prioridat ta e víktimanan i nan famia i no Arabia Saudi. “Kas blanku i e poder ehekutivo ta muchu mas interesá den konsiderashonnan diplomátiko”, asina e senador demókrata Chuck Schumer patrosinadó di e proyekto di lei a bisa. “Nos ta hopi mas interesá den e famianan i hustisia”.
Den un foro na Washington e direktor di CIA John Brennan a bisa ku e ta preokupá kon Arabia Saudi un aliado klave di Merka den medio oriente lo interpretá e lei. El a bisa ku e saudinan ta duna un kantidat signifikante di informashon di inteligensia na Merka pa frustra atakenan terorista.
