DEN HAAG, HULANDA, AFP.- Korte Internashonal di Hustisia a anunsiá djabièrnè ku lo eksaminá e disputa entre frontera di Guyana i Venezuela. E kaso ta durando pa mas di 100 aña kaba.
Venezuela a rechasá e intervenshon di Korte Internashonal, reklamando soberania di e region Esequibo, kual ta riku na mineral i mondi, i kual tin un zona marítimo ku petroli.
E presidente di korte di Nashon Uní a anunsiá ku e huesnan a disidí ku 12 voto na fabor i 4 kontra ku lo eksaminá e fondo di e konflikto aki.
E gobièrnu venezolano a bisa ku e desishon di Korte Internashonal ta un “eror inkomprensibel i insólito”.
E sekretario general di Nashon Uní, Antonio Guterres a pidi Korte Internashonal pa eksaminá e kaso na aña 2018.
