WASHINGTON, AP. – E kantidat di asesinato denunsia pa polis a oumentá ku mas di 10% na 2015 kompará ku e aña anterior, asina FBI a informá ayera.
E sifra general di krímennan violensia a oumentá 3,9% ounke e total ta sigui ta bou di e nivel kompará ku 2011 i 2006 segun FBI. E sifranan a keda mandá ayera via di forsanan polisial atraves di e programa Uniforme di Informashon di delitonan, ku ta kompilá informashon riba asesinato, asalto grave, ladronisia di outo i otro delitonan violento.
Statistik ta mustra 15.696 homisidio i morto no pro negligensia den 2015, 10.8% mas ku e aña anterior. Esaki no ta inkluí morto ku polis a konsiderá komo hustifiká.
Sekretario di hustisia Loretta Lynch a bisa ayera den un akto na Little Rock, Arkansas ku e datonan nobo aki ta mustra ku nan falta hopi pa hasi. Pero tambe el a añadí ku e delito den hopi komunidat ta keda stabil òf a baha. “I ta importante pa kòrda ku ounke e delitonan a oumentá, 2015 ta sigui ta e di tres aña ku ménos krímen violento den último dos dékada”, asina el a añadí.
