CARACAS, AP.- Pa tira ku un arma di kandela a bira un luho. E balanan ta karu i ta kosta un dòler pa kada unu. Awor ku tin ménos plaka riba kaya, e ladronisianan no ta mesun rendabel manera ántes. Asta pa delinkuentenan a bira mas difísil pa pasa luna.
E miembro di un gang “El negrito” a bisa ku “si bo tira un pistol afó, òf si polis kit’é fo’i bo, bo ta tirando 800 dòler afó”.
E gobièrnu sosialista di presidente Nicolás Maduro a stòp di publiká statistik di delinkuensia ya pa basta tempu kaba.
Pero ekspertonan ta señalá ku e kantidat di asesinato i atrako a baha dor di e krísis ekonómiko, den un di e paisnan mas violento na mundu.
Opservatorio venezolano di Violensia, un grupo ku sede na Caracas ta kalkulá ku e kantidat di asesinato a baha ku 20% den e último tres añanan.
E inflashon den e pais a yega un mion porshento aña pasá, kombirtiendo Bolivar kasi inútil apesar ku kaheronan outomátiko no tabata duna mas di un dòler. E skarsedat grave di kuminda i remedi a forsa mas o ménos 3,7 mion persona pa buska un mihó bida na paisnan manera Colombia, Panama, i Perú, den su mayoria hòmbernan hóben.
E lider opositor Juan Guaidó a start un kampaña pa retirá presidente Maduro. E lider tin sosten di Merka i mas ku 50 pais mas. Ainda e no a logra kumpli ku su promesanan di restourá demokrasia, reaktivá ekonomia i hasi e kayanan den Venezuela mas safe.