LIMA, AP.- Presidente peruano Pedro Kuczynski a bisa ku e tabata sperando un huisio rápido kontra eks mandatario Ollanta Humala i su kasa Nadine Heredia. Nan ta detené i mester wòrdu manda prisòn miéntras ku investigashonnan di Odebrecht ta andando.
“Mi ta spera ku e proseso di señor Humala i su kasa kana rápidamente i di manera transparente”. Asina Kuczynski a bisa durante un aktividat públiko i a agregá ku el a tuma e notisia aki ku ‘tristesa’.
“Mi ta kere ku e dia aki ta trágiko pa famia Ollanta i Nadine”, asina el a agregá. Dos yu di e pareha di 15 i 13 aña ta den Merka den un kurso di interkambio eskolar i lo regresá Lima riba promé di ougùstùs.
Wilfredo Pedraza, abogado di Humala, a bisa ku anochi e pareha a laga su terser yu drumi promé ku nan a bai entrega na outoridat.
Humala i su kasa a presentá djaweps dilanti di hues den sentro dje kapital i despues a wòrdu hiba pa Palasio di Hustisia, kaminda mayoria biaha ta warda prezunan promé ku nan wòrdu hiba pa diferente prizòn den e pais.
Djaweps, hues Richard Concepcion a ordená pa detené Humala i Heredia pa 18 luna komo prevenshon, miéntras nan ta wòrdu investigá pa un fiskal ku ta sospechá ku e pareha a kometé delito di labamentu di plaka despues di risibí sèn di kompania brasilero Odebrecht.
