LONDON, AP.- Mas di 70 legislador britániko a pidi gobièrnu pa sigurá ku e fundadó di WikiLeaks, Julian Assange, ta enfrentá su sentensia na Suesia si fiskal di e pais inisiá un kaso di violashon den su kontra.
Den un karta firmá djabièrnè anochi, e legisladornan a pidi e sekretario di Interior, Sajid Javid, “pa hasi tur loke e por pa promové akshonnan ku ta sigurá ku Julian Assange ta wòrdu ekstraditá pa Suesia si e pais presentá un solisitut di ekstradishon”.
Outoridat hudisial sueko a suspendé su investigashon relashoná ku delito seksual dos aña pasá, dor ku el a keda den embahada di Ecuador na London ku status di asilo polítiko.
Assange a wòrdu arestá djaweps despues ku e gobièrnu di Quito a retirá su protekshon. E ta detené pa outoridat britániko i ta enfrentá solisitut di ekstradishon di parti di Merka pa infiltrá e kòmpiuter di Pentágono.
E fundadó di WikiLeaks, kende ta ninga di a kometé un delito, ta den prizòn di Belmarsh, na sùitost di London, sperando un kondena pa violá e términonan di su libertat ku fiansa den e pais. E lo lucha kontra e pedido di ekstradishon pa Merka.
