WASHINGTON, AP.- E lider demókrata di Senado, Chuck Schumer, a retirá su oferta di destiná míles di miónes di dòler na muraya na frontera ku e presidente Donald Trump ta deseá.
Matt House, e bosero di Schumer, a bisa djamars ku e ofisina di e legislador a notifiká Kas Blanku di e retiro di e oferta hasí originalmente djabièrnè pa otorgá finansiamentu na e muraya a kambio di ofresé protekshonnan na 700.000 hóben migrante ku ta biba sin pèrmit legal den Merka. Trump a rechasá e oferta.
Presidente Donald Trump a ekspresá djamars mainta ku “niun hende” sa si e republikano i demókratanan por yega na un akuerdo di inmigrashon pa 8 di febrüari. El a bisa ku e demókratanan a siña ku dor di sera gobièrnu esaki no ta funshoná.
Trump a Tweet: “Niun hende no sa ku seguridat si e republikanonan i demókratanan por yega na un akuerdo riba DACA pa 8 di febrüari, pero tur lo purba esaki, ku un enfoke adishonal riba forsa militar i seguridat na frontera. E demókratanan a kaba di haña sa ku un siere no ta e kontesta”.
