CARACAS, AP.- E dirigente opositor Leopoldo Lopez benefisiá ku aresto di kas despues di mas di 3 aña den un prisòn militar, a bisa djasabra ku e no tin niun intenshon di stòp ku su lucha i ta mantené su mes firme den e oposishon kontra régimen.
Algun ora despues di a regresá kas den e bisindario eksklusivo di Los Palos Grandes, Lopez a aparesé ku un sonrisa den porta di kas, bisti ku un kamisa blanku, na momentu ku e tabatin bandera venezolano den man i ku brasa na laira el a saludá e siguidónan di kual hopi ku nan sombré trikolor bisti, tabata dilanti di su kas.
“Mi ta mantené mi oposishon firme kontra e régimen i firme den mi konvikshon di lucha pa e pas di bèrdat, konvivensia, kambio i libertat”, asina Lopez a afirmá den un komunikado ku presidente di kongreso Freddy Guevara a lesa.
El a añadí ku no tin motibu pa e stòp ku su lucha i e ta dispuesto na kore e rísiko di bolbe bai prisòn bek. Den un akto ku siguidónan den e estado oriental di Anzoategui presidente Nicolas Maduro a indiká ku e medida ku e tribunal máksimo a duna Lopez ta despues di un proposishon ku e komishon presidensial a presentá i ku a keda aprobá pe i el a agregá ku e ta spera ku e opositor lo duna un mensahe di rektifikashon i di pas pasobra e pais ke pas.
Maduro a rekordá ku e dirigente opositor a keda prosesá i prezu pa responsabilidat di fiskal general, Luisa Ortego Diaz kende ta enfrentando kontra gobièrnu despues di vários aña di ta vinkulá den ofisialismo.
“Hamas mi a move un dede pasobra hamas mi a intervení den desishonnan di Ministerio Públiko”, asina e mandatario a sigui bisa.
