CIUDAD DE MEXICO, MEXICO (AFP).- Presidente de México, Andrés Manuel López Obrador, a primintí ku den masha poko tempu lo rekonstruí e haf di Acapulco, un luna despues ku e orkan Otis a bati e siudat lagando 50 morto i masha hopi edifisio destruí. “Nos ke hasi e trabou den masha poko tempu, pa nos por tin kasnan nobo, di fèrf ku e kolónan ku ta gustá den trópiko, na kosta, kolónan alegre”, segun e mandatario den konferensia di prensa.
Orkan Otis, ku a bati Acapulco den luna di òktober komo e máksimo kategoria 5, a laga un destrukshon enorme den e siudat di 780.000 habitante, ku ta biba di prinsipalmente turismo.
E presidente a trese dilanti ku su gobièrnu lo duna apoyo dirèkt na famianan pa e rekonstrukshon di alrededor di 250.000 kas ku a keda dañá ku e orkan.
“Nos tur tin ku partisipá pa rekonstruí e kasnan mas lihé posibel. “Imaginá bosnan, ku gobièrnu so konstruyendo 250.000 kas, ki tempu nos lo kaba?”, el a puntra.
E mandatario a agregá ku su gobièrnu tin sufisiente rekurso pa rekonstrukshon dje haf, un dje áreanan di fakansi mas importante di Mexico. “Nos no ta bai limitá nos mes na presupuesto, tin sufisiente sèn”, segun el a sigurá.
Di su parti,e gobernadó di e siudat Guerrero, Evelyn Salgado, a bisa ku te na e momento tin 50 morto i 30 hende ku a disparsé despues dje orkan.
Na kuminsamentu di novèmber, e gobièrnu di Lopez Obrador a anunsiá un plan di apoyo di 3.500 mion dòler pa e damnifikadonan dje orkan, meimei di reklamo di habitantenan ku gobièrnu ta atendé e problema demasiado poko poko.
