RIO DE JANEIRO, AP.- Eks presidente di Brasil, Luiz Inacio Lula da Silva a keda sentensiá djárason na nuebe aña i mei di prizòn pa korupshon i labamentu di plaka. E tabata e persona mas renombrá ku a wòrdu kondená komo parti di un investigashon kontra desena di persona ku ta pertenesé na e élite di e pais latinoamerikano.
Hues federal Sergio Moro a dikta e sentensia, pero e eks mandatario lo keda liber i ta apelando su kaso.
E desishon ta loke mayoria a pensa, asta ekipo di Lula da Saliva a spera esaki. E mandatario karismátiko a bandoná su kargo ku popularidat haltu i a risibí krédito pa saka miónes di brasilero di pobresa i pa kombertí e pais mas grandi den Latinoamérika den un aktor importante mundialmente.
Ku su 71 aña e ta un di e faboritonan pa elekshon presidensial di otro aña.
E kaso ta parti di un investigashon ekstenso di korupshon ku ta konsentrá riba petrolero estatal Petrobras. E kaso a manda vários polítiko i ehekutivonan haltu den Brasil prizòn.
E eks mandatario ta akusá di haña un apartamentu dilanti di playa i di aseptá remodelashonnan na kas komo soborno di e kompania di konstrukshon OAS.
