PARIS, AP.- Presidente franses Emmanuel Macron a reuní ku opositornan venezolano ku ta purbando di oumentá e preshon internashonal riba e gobièrnu di Nicolas Maduro, ku djaluna a entrega notanan di protesta na Alemania, Italia, Spaña i Reino Uni, indikando un intromishon den asuntunan interno di e pais suramerikano.
Diputado Julio Borges, presidente di Asamblea Nashonal, su visepresidente diputado Freddy Guevara, i e aktivista di oposishon Roberto Patiño tabata esnan ku a yega djaluna den Elysee na Paris. Algun dia pasa, Macron a bisa ku e gobièrnu di Maduro ta un diktadura.
Lilian Tintori, aktivista i kasa di prizonero polítiko i lider opositor Leopoldo Lopez, no por tabata presente. Tintori a denunsiá outoridat venezolano kende a konfiská su pasport i kende a prohibié di Sali di su pais debí na un proseso hudisial ku a start despues ku polis a konfiská un suma mionario di bolívar kèsh.
E kansier venezolano Jorge Arreaza a kuestioná e pronunsiashonnan ku a wòrdu realisá pa outoridatnan di Spaña i Reino Uni riba prohibishon di salida di Tintori.
Borges a bisa den un komunikado ku e siguiente dianan lo reuní ku kansier aleman Angela Merkel, promé minister britániko Theresa May i ku presidente di Gobièrnu spañó, Mariano Rajoy.
