PAPRIS, AP.- Presidente franses, Emmanuel Macron a deklará djamars ku e ta deseá pa e Katedral di Notre Dame wòrdu rekonstruí den sinku aña.
“Nos lo rekonstruí e Katedral di Notre Dame mas bunita”, asina e mandatario a deklará durante un diskurso televisá dirigí na e nashon.
Macron, kende a komentá ku “nos tin hopi kos di drecha”, a gradisí e bomberonan i polisnan ku a akudí na e sitio pa kombatí e vlamnan di kandela i e personanan ku a hasi donashon pa drecha e monumento.
E direktor di e patrimonio di Notre Dame a indiká ku algun lo yama esaki un milager, pero solamente un parti di e arkitektura den e katedral a resultá daña.
Laurent Prades a bisa na The Associated Press ku e altar prinsipal, instalá na aña 1989, a risibí daño despues ku e toren a kai entre e vlamnan di kandela. “Nos a logra salba e otro kosnan”, asina Prades a bisa.
e minister di interior di Fransia a sigurá djamars ku ainda tin riesgo pa e struktura di e Katedral di Notre Dame.
E minister Christophe Castaner a bisa na reporteronan ku e struktura “ta bou di vigilansia permanente pasó ainda e por tambaliá”.
El a agregá ku empleadonan públiko mester warda 48 ora promé ku nan drenta e katedral i kuida e obranan di arte den esaki. Algun di e obranan tabata demasiado grandi pa wòrdu saká.