WASHINGTON, MERKA, AFP.- Emmanuel Macron den e promé dia di su bishita na e estado aki, a lamentá na Washington e medidanan ekonómiko super agresivo ku Biden a tuma pa asina impulsá e industria merikano.
“E supsidionan masivo inkluí pa Biden den un lei ekonómiko i sosial yamá Lei di redukshon di inflashon IRA ta super agresivo pa nos empresanan”, asina e presidente franses a reklamá durante di un reunion ku kongresistanan merikano, asina e periodista di AFP a konstatá.
“Pone bosnan mes den mi lugá”, asina el a bisa durante di un almuerso ku mester a pone atenshon riba kambio di klima. I el a agregá ku kisas esaki ta solushoná nan problema pero e ta empeorá esun di dje ku e programa di invershonnan aki.
Segun Macron, e medidanan por mata hopi kupo di trabou na Oropa si no eksistí un mihó kordinashon transatlántiko.
“Niun hende a tuma kontakto ku mi ora tabata debatí riba e IRA”, asina el a sigui bisa “mester tabatin rèspèt komo un bon amigu”. Fransia ta mira ku wowo malu e patriotismo ekonómiko di presidente demókrata ku ta sigui ku e lema “made in USA” esta fabriká na Merka.
Biden tin intenshon di impulsá entre otro, e sektor di outo elektróniko pa promové e empleo industrial, e transishon energétiko i e kompetensia teknológiko ku China.
