CARACAS, AP.- Presidente Nicolás Maduro a mustra dispuesto na mantené lasonan komersial ku e kompania petrolero merikano Chevron kual su relashon ku Venezuela a wòrdu afektá pa e sanshonnan ekonómiko severo di Washington. Esaki a bolbe forma tenshon entre e dos paisnan.
Maduro a reuní ku e presidente di Chevron pa Amérika i Afrika, Clay Neff, i e asesor di e empresa, Ali Moshiri, pa eksplorá mekanismonan ku ta permití mantenshon di relashon ku e korporashon estatal Petroleos de Venezuela S.A. (PDVSA), segun señalashon di un komunikado di e empresa venezolano.
Den e enkuentro, visepresidente Tareck El Aissami; minister di Petroli, Eulogio Del Pino; minister di planifikashon, Ricardo Menendez, i presidente di PDVSA, Nelson Martinez tambe tabata presente.
Washington a pone sanshonnan finansiero kontra Venezuela kual ta inkluí e prohibishon di bankonan merikano di realisá transakshonnan nobo ku e gobièrnu i PDVSA, operashonnan ku bono i e pago di dividènt na gobièrnu di parti di Citgo, e filial merikano di e empresa petrolero estatal.
Despues di e anunsio di sanshon, Maduro a bisa ku outoridat venezolano lo reuní ku empresanan petrolero i tenedónan di bono.
Washington a tuma e medidanan despues ku presidente Maduro a disidí di impulsa e Asamblea Konstituyente.
