AMSTERDAM, ULANDA, AFP.- Un grupo di manifestante a interumpí ayera e diskurso di presidente franses Emmanuel Macron na Den Haag riba e promé dia di un bishita di estado na Ulanda.
Ora e kier a tira su diskurso riba e futuro di Oropa, Macron a keda interumpí dor di gritunan.
“Unda demokrasia franses ta” òf “E konvenshon riba klima no ta respetá”, asina e manifestantenan tabata grita, kargando tambe bòrchinan ku tabata bisa “presidente di violensia i hipokresia” na ingles.
E ehekutivo ta konfrontando un kantidat di manifestante kontra di e reforma di penshun, ku ta buska na subi e edat di baha ku penshun di 62 pa 64 aña.
Durante di su diskurso, ku a dura 30 minit, Macron a defendé un outonomia mayor di Oropa na nivel ekonómiko i a insistí riba e nesesidat di reforsá e kompetitividat den e kontinente via di reformanan. Tambe el a referí na e falta di kompetitividat di e sektor industrial ku el a kalifiká un tabú.