HONG KONG, AP.- E manifestantenan na Hong Kong a kima un bandera chines djasabra i polis a tira gas lakrimógeno durante konfrontashonnan antigubernamental nobo durante un fin di siman mas di mobilisashon kontra e gobièrnu chines i e teritorio semi outónomo.
Polis a akusá algun manifestante di tira eksplosivo despues di un marcha di vários mil persona na Tuen Mun, un distrito na nortwèst di e teritorio chines.
E marcha di djasabra tabata relativamente chikitu kompará ku esnan anterior. No a registrá ningun insidente violento manera den marchanan ku a wòrdu marka ku konfrontashonnan ku polis. E manifestashonnan anterior a wòrdu realisá durante tur fin di siman.
E protestanan a kuminsá den yüni pa oponé kontra un proyekto di lei di ekstradishon i desde e tempu ei, e manifestantenan a amplia nan demanda pa eksihí mas demokrasia.
Mayoria protesta tabata pasífiko, pero algun manifestante a kima un bandera di China, kual tabata dilanti di un ofisina di gobièrnu.
Un deklarashon di gobièrnu a bisa ku algun manifestante a “tira bòm di gasolin” pero no a duna detaye di posibel leshon òf dañonan okashoná. E deklarashon a pidi e pueblo di e área pa keda den kas i pa tene tur bentana será.
E deklarashon a bisa ku e manifestantenan a kousa vários daño no spesifiká na e stashon di trein Tuen Mun i a tira opheto riba e trayekto di trein.
