BAGHDAD, IRAK, AFP.- Partidarionan di e lider shiita Moqtada Sadr a invadí Zona Bèrdè, e zona mas protehá di Baghdad kaminda tin institushonnan di gobièrnu i embahadanan, pa protesta kontra kandidatura pa promé minister di un partido polítiko rival.
Promé minister, Mustafa Al-Kazimi, a pidi e manifestantenan “pa sali inmediatamente” for di e zona i a atvertí den un komunikado ku forsanan di seguridat ta “garantisá protekshon di institushonnan di Estado i mishonnan estranhero, i lo impedí tur violashon di seguridat i òrdu”.
Na momentu ku e manifestantenan a drenta e zona, nan a purba yega Parlamento, pero polis a tira gas lakrimogeno pa impedí esaki, segun indikashon di un fuente di seguridat na AFP.
Pero e manifestantenan a regresá i “drenta Parlamento” segun indikashon di un funshonario di Ministerio di Interior, ku a pidi pa keda anónimo.
Un periodista di AFP den Zona Bèrdè a bisa ku e manifestantenan ta kargando un persona levemente heridá despues ku agentenan a tira e gasnan.
Dies luna despues di elekshon legislativo den òktober 2021, ainda e situashon polítiko ta stanká na Irak.
E manifestantenan a protesta kontra kandidatura di promé minister Mohamed Chia Al Soudani, un èks minister i gobernador provinsial di 52 aña.
