CHARLOTTE, AP.- Vários manifestante a bisa ku nan lo asistí na un reunion di konseho di e siudat di Charlotte pa eksihí e renunsia di alkalde i di hefe di polis, despues ku un hòmber koló skur a muri siman pasá tirá pa polis. Entre tantu e toke de keda a keda retirá.
E manifestantenan kendenan a papia ku e kanal di televishon WCNCTV a bisa di lo asistí na e enkuentro den oranan di atardi, nan ta rabia ku e forma kon e alkalde Jennifer Roberts i e hefe di polis Kerr Putney a manehá e investigashon di morto di Keith Lamont Scott di 43 aña di edat dia 20 di sèptèmber.
Polis ta bisa ku Scott tabata representá un menasa i ku el a nenga di laga su arma kai apesar ku a pidié esaki vários biaha. Su famia a bisa ku Scott no tabata armá.
A kita e toke de keda na Charlotte i asina posibel relahashon di e protestanan. Un fin di siman sin violensia den kaya a konkluí ku e selebrashon den e siudat di e wega di NFL entre Panthersw di Carolina i Vikings di Minnesota. Apesar di esei e manifestashonnan a sigui durante di 6 dia.
Imágennan di e video ku a keda publiká djasabra dor di polis no a trese klaridat si Scott a menasá outoridatnan ku un pistol promé ku nan a tir’é. E hefe di polis a bisa djasabra ku Scott tabata den poseshon di un pistol i a agregá ku ounke e polisnan no a violá lei e ofisina estatal di investigashon ta kontinuá dediká atenshon na e kaso aki. Residentenan di e siudat ta bisa ku Scott tabata desarmá. No ta kla den e video di e hòmber tabatin algu den su man promé ku nan a tir’é. E video ta mustra polisnan rondó di e hòmber promé di a tira esaki mata.
Polis a publiká djasabra tambe potrèt di un pistol karga ku a haña na e lugá di e echonan i a bisa ku esaki tabatin markanan di Scott esta su DNA i fingerprint riba dje.
