PETROPOLIS, BRASIL, AFP.- E siudat brasilero di Petropolis a bolbe registrá áwaseru fuerte, tres dia despues di un temporal históriko ku a laga 122 morto i a kubri barionan henter ku lodo, bou di kual ainda tin hende ku ta disparsé.
Bèk di su biahe pa Rusia i Hungria, presidente Jair Bolsonaro a bula ayera riba e siudat aki i a bishita e zona destrosá, kompaña di vários di su ministernan.
“Nos a mira un destrukshon intenso, un imágen kasi di guera”, asina Bolsonaro a bisa den deklarashon na televishon. E presidente a defendé su mes di e krítikanan a base di e tragedia, ku a sosodé a konsekuensia di áwaseru fuerte den un zona di seru i di konstrukshonnan prekario.
‘Nos no sa kiko lo bai pasa riba un área di 8,5 kilometer kuadra di superfisie di Brasil, esaki ta un region aksidentá, no ta promé bes ku ta sosodé un tragedia akinan. Nos lo bai pone di nos parti”, el a agregá.
Na e siudat bieu aki, ku ta keda na nort di Rio de Janeiro, ta sigui traha duru, ounke e speransa di haña víktimanan ku bida ta kabando.
