LONDON, AP.-E skandal ku ta rondoná e klase polítiko britániko a profundisá djadumingu ku mas denunsia di abusu seksual, poder i otro aktonan indebí. Entre esakinan tin nuebe akusashon ku ta involukrá un aliado klave di Theresa May.
Damian Green, promé sekretario di Estado i man drechi di May, a ninga un informe di e korant Sunday Times ku a indiká ku polis a haña pornografia ekstremo riba su kòmpiuter durante un investigashon nuebe aña pasa.
Green ya tabata wòrdu investigá pa kondukta in-apropia kontra un aktivista di Partido Konservador. Djadumingu, e funshonario a bisa ku e historia di Sunday Times tabata kompletamente falsu i ku esaki a Sali di un fuente polisial korupto i no konfiabel.
“E akusashonnan riba e material i kòmpiuter, di nuebe aña pasa, ta falsu i ta bini di un funshonario di polis desakredita ku no a kumpli ku su deber di mantené sekreto e detayenan di investigashonnan polisial”, asina Green a bisa.
E akusashonnan a surgi debí na un skandal di abusu seksual di parti e merikano Harvey Weinstein i ta muchu mas kompliká ku esnan di Green i di e eks sekretario britániko di Defensa Michael Fallon, kende a renunsia siman pasa despues di algun denunsia di komportashon in-apropia.
