YAKARTA, AP.- Dokumentonan no klasifiká ta revelá detayenan nobo di e ròl di Merka den un kampaña di eksterminashon den kual e ehérsito indones a mata míles di sivil durante di e guera anti komunismo mei mei di dékada 1960.
Míles di dokumento di embahada di Merka na Yakarta di e periodo di 1963 i 1966 a keda revelá djamars despues di un proseso di no klasifikashon ku a kuminsá bou di e gobièrnu di Barack Obama. The Associated Press tabatin akseso na e dokumentonan ei i a revisá esakinan promé ku pone nan na publisidat.
E dokumentonan ta pinta un reino di teror devastador imponé pa ehérsito indones i organisashonnan musulman ku a keda deskubrí pa historiadónan i den un publikashon di departamento di estado merikano ku a keda no klasifiká na 2001 apesar di e esfuersonan di CIA pa blòkia su publikashon.
Na 1965 Indonesia tabatin e di tres partido komunista di mas grandi na mundu, superá solamente pa esun di China i Union Soviétiko. E ta konta ku vários mion di afiliado i e presidente di Indonesia, e karismátiko Sukarno tabata un sosialista i anti norteamerikano ferviente.
Outoridatnan merikano a mira ku alarma loke a parse un marcha imparabel pa komunismo i a festehá ora generalnan konservadó a imponé nan mes na Yakarta, nan a tuma e radio estatal i a kuminsá un kampaña pa eliminá e partido komunista ku e preteksto di ku trata na derotá e gobièrnu. Den algun luna ehérsito a gana un bataya polítiko ku Sukarno i Indonesia a alinia ku Merka, habriendo un merkado enorme pa produktonan i empresanan merikano.
E dokumentonan ku a kaba di wòrdu no klasifiká ta indiká ku Merka tabata sa for di kuminsamentu di e matansa i el a sòru pa no tuma medida ku a stroba e kampaña di e ehérsito indones. Historiadónan ya a komprobá ku Merka a entregá un lista di dirigentenan komunista haltu ku funshonarionan merikano tabatin informashon konfiabel ku tabata kontradesí e afirmashon di ehérsito indones di ku e sekuestro i asesinato di vários general den un intento frakasá di gòlpi di ofisialnan hóben dia 30 di sèptèmber 1965, kual a habri e kaminda pa e baño di sanger, ku a keda ordená pa e partido komunista i Beijing.
