BRUSELAS, AP.- E promé minister di Gran Bretaña, Theresa May, a kuminsá su djaweps ku un diálogo ku lidernan di Union Europeo, tokante e akuerdo pa Brexit.
E presidente di Komishon Europeo, Jean-Claude Juncker a risibí e dirigente britániko. Desde e negosiashonnan pa Brexit a surgi un tenshon fuerte entre Gran Bretaña i e otro 27 sosionan di e bloke.
Ku 29 di mart komo fecha di salida, e funshonarionan posiblemente lo oponé na May su intento pa negoshá e pakto atrobe, kual ta legalmente vinkulante i kual a wòrdu respaldá pa parlamento europeo den novèmber. Kámara di Komun a rechasá esaki ku un gran mayoria den yanüari.
Na yegada di May, un reunion “sólido pero konstruktivo” di 90 minüt a kuminsá kaminda Juncker a enfatisá ku lo no bolbe negoshá e pakto pa Brexit.
Mayoria legislador pro Brexit a indiká ku lo no respaldá e akuerdo di separashon si no eliminá e ‘backstop’ irlandes entre e puntonan.
May, kende ta purbando di logra algun konseshon pa e pakto di 585 página, ta insistí ku por yega na un akuerdo “alternativo”.
