LIMA, PERU, AFP.- E presidente di Perú, Manuel Merino, a renunsiá sinku dia despues ku el a okupá e puesto di presidente, kual a kousa un serie di protestá fuertemente reprimí pa agentenan polisial, kaminda dos persona a muri i sentenáres a keda heridá.
Merino a sustituí e mandatario popular Martin Vizcarra, un dia despues ku Kongreso a bah’é pa un kaso di korupshon.
Kongreso mester nombra un presidente nobo pa pasifiká e pais. Esaki lo bira e terser presidente den un siman, den e nashon gravemente afektá pa pandemia di Coronavírus i reseshon ekonómiko.
Merino a bisa ku e 18 ministernan ku el a huramentá djaweps lo kontinuá den nan puesto temporalmente, ounke praktikamente tur a renunsiá despues di e represhon di manifestantenan djasabra.
Perú no tin un presidente ainda, i Kongreso mester nombra un miembro nobo. Kisas esaki lo bira un di e 19 parlamentarionan ku no a vota na fabor di destituí Vizcarra.
E manifestashonnan di djasabra a laga dos morto i 94 herido, segun ministerio di salú. Pero e Kordinadó Nashonal di Derechi Humano a afirmá ku tin 112 persona heridá i a agregá ku tin 41 manifestante mas ku ta pèrdí den Lima i otro siudatnan den e pais.
E represhon di e protestanan aki a kosta Merino su sosten polítiko. E presidente di Kongreso, Luiz Valdez a eksigí “renunsia inmediato” di Merino.
