BURDEOS, FRANSIA, AFP.- Sentenáres di katóliko a protestá fin di siman na Fransia, manifestando kontra e prohibishon di misa durante e ‘lockdown’ di COVID-19, kual lo dura te ku komienso di desèmber.
Ounke iglesianan ta keda habrí durante e di dos ‘lockdown’ aki den Fransia, misanan ta prohibí. Mas o ménos 300 persona a kongregá dilanti e katedral di Burdeo pa laga nan selebrá e seremonia aki.
E manifestantenan a bisti masker i konsentrá den gran kantidat apesar di e prohibishon di reunion públiko riba kaya durante e ‘lockdown’.
Apesar di e restrikshonnan pa para e Corona vírus den Fransia, iglesianan por akohé seremonianan di kasamentu i entiero, ku un presensia máksimo di 30 i 6 persona respektivamente.
E minister di interior franses Gerald Darmanin a atvertí ku e lo no tolerá un di dos fin di siman konsekutivo di manifestashon ilegal di e katólikonan.