WASHINGTON, MERKA, AFP.- Un general di rango haltu a atmití ku Merka a kometé un “eror” despues ku a lansa un atake ku drone kontra miembronan di Estado Islámiko (EI) na Kabul, matando 10 sivil, inkluyendo vários mucha, durante e último dianan di Merka su retirada for di Afganistan.
E meta di e atake tabata un operashon di Estado Islámiko kontra aeropuerto di Kabul, segun indikashon di e Komandante merikano, Kenneth McKenzie.
“E atake tabata un eror trágiko”, asina Mckenzie a bisa na periodistanan despues di un investigashon.
E sekretario di Defensa di Merka, Lloyd Austin a ofresé su “diskulpa” na famianan di víktimanan di e atake. McKenzie a bisa ku gobièrnu lo paga daño perhuisio na famia di e víktimanan.
E atake ku drone a mata 10 persona, inkluyendo 7 mucha, segun indikashon di McKenzie. Niun di nan tabata vinkulá ku Estado Islámiko. Un di e mortonan tabata un afgano ku tabata traha pa un grupo di yudansa merikano.
