NASHON UNI, MERKA, AFP.- Konseho di Seguridat di Nashon Uní a renobá su mishon polítiko den Afganistan ku seis luna mas, den un resolushon kaminda ta pidi pa Talibannan krea “un gobièrnu inklusivo, representativo” i ku partisipashon di hende muhé den sosiedat.
E resolushon adoptá pa 15 miembro di Konseho a pone énfasis riba “e importansia pa establesé un gobièrnu inklusivo i representativo”. Ademas esaki ta pidi pa inkluí partisipashon di tur hende muhé, igualdat i rèspèt di derechi humano, inkluyendo esnan di hende muhé, beibinan i minorianan”.
E resolushon ta rekonosé “ku mester hasi mas esfuerso pa proveé yudansa humanitario na Afganistan” i a “lucha kontra terorismo” den e pais.
Segun fuentenan diplomátiko, e talibannan no tabata kontra e prolongashon di e mishon di Nashon Uní.
Den e último simannan, vários organisashon no gubernamental manera Amnistia Internashonal i Human Rights Watch a insistí pa Nashon Uní i kasi 2.000 representante keda den Afganistan. Nan a hasi e petishon aki pa e organisashonnan reportá kasonan di abusu kontra derechi humano entre otro.
