WASHINGTON, AP.- Outoridat na frontera di Merka kier oumentá e kantidat di solisitantenan di asilo ku ta wòrdu debolbé México diariamente ku mas di kuater biaha e kantidat. Esaki ta un oumento importante den esfuersonan di e gobièrnu merikano pa para e kantidat kresiente di sentroamerikanonan ku ta yega e pais, segun revelashon di un funshonario di Washington djasabra.
Esaki lo ta e intento mas resien pa aliviá e sistema di imigrashon. Agentenan ku normalmente ta inspekshoná karga i vehíkulonan na frontera a wòrdu asigná pa yuda manehá e migrantenan.
Sekretaria di Seguridat Nashonal, Kirstjen Nielsen, a pidi voluntarionan di agensianan no migratorio den su departamento pa yuda. Ademas el a manda un karta pa Kongreso na final di siman pasá pa pidi rekurso i mas outoridat pa deportá e famianan mas rápido. El a reuní ku funshonarionan sentroamerikano i mehikano tambe.
E esfuersonan aki ta sosodé miéntras presidente Donald Trump ta oumentando su menasanan pa sera frontera ku México kompletamente, un medida ku lo tin reperkushonnan ekonómiko grave tantu pa Merka komo pa México. Pero esaki lo no impedí e migrantenan di krusa via zonanan ku no ta wòrdu supervisá.
Su gobièrnu a anunsiá ku ta suspendiendo yudansa pa e paisnan sentroamerikano for di unda mayoria migrante ta sali.
Te ainda, mas o ménos 60 persona ku ta buska asilo ta wòrdu debolbé tur dia di nobo pa México atraves di San Ysidro, Calexico i El Paso pa warda un kontesta riba nan kasonan. Nan ta haña pèrmit pa regresá Merka pa risibí e fecha kaminda e migrante mester paresé den korte.
