WASHINGTON, AP.- E gobièrnu merikano a inisiá trámitenan djaluna pa no aseptá mas solisitut di asilo di migrantenan sentroamerikano ku ta yega frontera, den un eskala importante di e bataya di presidente Donald Trump pa para e kantidat di personanan ku ta krusa frontera entre Merka i México.
Algun solisitante ta yega for di Afrika, Cuba òf Haiti pero resientemente gran mayoria a yega for di Sentroamerika.
E norma mester drenta na vigor awe, i ta wòrdu apliká pa muchanan ku krusa frontera sin kompaño di un mayor tambe.
Tin algun eksepshon: si e migrante ta víktima di kontrabanda, si e pais ku el a krusa no a firma un di e tratadonan internashonal ku ta manehá e migrante su situashon òf si un solisitante a buska protekshon den un otro pais. solamente den e kasonan aki e persona por pidi asilo na Merka.
E desishon di gobièrnu di presidente Donald Trump ta destiná prinsipalmente na pone fin na e protekshonnan di asilo, manera ta e kaso na sùit di frontera. E desishon lo kambia e forma kon Merka ta trata refugiadonan.
E sekretario di hustisia William Barr a bisa den un komunikado ku e medida nobo ta “un ehersisio legal di outoridat” pa redusí e solisitutnan di asilo, agregando ku Merka ta un “pais generoso” pero ta “kompletamente abruma” pa e ola di migrantenan ku ta yega parti sùit di e pais su frontera.
