WASHINGTON, AP.- Kuater miembro di ehérsito chines a wòrdu akusá di drenta den e sistema di e agensia di krédito Equifax i hòrta informashon personal di miónes di merikano, segun informashon di Departamento di Hustisia djaluna. Beijing a wòrdu kulpa pa un di e infiltrashonnan teknológiko mas grandi den historia.
E kiebro a sosodé na 2017 i a afektá mas di 145 mion persona hòrtando nan nòmber, adrès, number di seguridat sosial, reibeweis i oro informashonnan personal den e base di dato di e kompania.
E kuater personanan, miembro di Ehérsito Popular di Liberashon ta akusá di hòrta sekretonan komersial tambe di e kompania, inkluyendo diseño di basenan di dato, segun outoridat merikano.
E hackernan a probechá di un vulnerabilidat den e software pa haña akseso na e kòmpiuternan di Equifax.
“E eskala di e robo tabata impreshonante”, asina e sekretario di Hustisia William Barr a bisa djaluna. “E robo a kousa un daño finansiero signifikativo pa Equifax i tambe invadí privasidat di miónes di merikano.
Equifax, ku sede na Atlanta tin un depósito enorme di informashon ku e ta bende ku otro negoshinan. E kompania tin informashon di miónes di merikano riba e teritorio i den eksterior, segun e akusashon a agregá.
