WASHINGTON, MERKA, AFP.- Merka a outorisá un terser vakuna di COVID-19 pa tur persona riba 18 aña, seis luna despues di kompletá e promé serie di vakunashon, segun indikashon di outoridatnan di salubridat.
Komisario interino di FDA, Janet Woodcock a bisa ku e outorisashon di uso di emergensia di Pfizer i Moderna a yuda ku protekshon kontra “konsekuensianan grave ku por sosodé, manera hospitalisashon òf morto”.
FDA a basa su desishon riba datonan di personanan ku a haña dos vakuna di COVID. E empresanan ya a anunsiá ku nan a haña e aprobashon di FDA.
Esnan riba 18 aña ku a haña solamente un dósis di Johnson & Johnson ta bini na remarke pa un di dos dósis, dos luna despues di e promé inyekshon.
Den kaso di e vakunanan di Pfizer i Moderna e terser dósis tabata reservá solamente pa esnan riba 65 aña, adultonan den grupo di riesgo òf esnan ku ta kore rísiko haltu di pega ku e vírus, por ehèmpel via trabou.
E kasonan di COVID ta oumentando atrobe den Merka, ku un promedio di 85.000 kaso nobo di COVID-19 tur dia i 1.000 morto diario.
