NEW YORK, AP.- E gobièrnu di Donald Trump ta triplikando yudansa di Merka na oposishon na Venezuela i pa promé biaha lo aportá ku plaka direktamente na Guaidó, kende ta purbando di forma un gobièrnu ku ta remplas’é esun di e presidente aktual Nicolás Maduro.
E pakete di 52 mion dòler a wòrdu anunsiá pa e direktor di Agensia pa Desaroyo Internashonal Mark Green, despues di un reunion ku e representante di Guaidó, Carlos Vecchio, kende Trump su gobièrnu ta rekonosé komo embahador di Venezuela na Washington.
Merka lo usa fondonan kual tabata destiná pa Honduras i Guatemala aña pasa. E pais a anulá entrega di e fondo dor ku e paisnan no a hasi sufisiente pa kontené e fluho di migrante.
Merka ta oumentando su sosten na Guaidó, kende ta rekonosé komo e presidente legal di Venezuela pa mas di 50 pais, ounke e no a logra haña poder apsoluto. Venezuela ta afektá pa inflashon haltu i un krísis ekonómiko kual por wòrdu konsiderá komo un nashon den guera.
Un funshonario di e gobièrnu merikano a bisa ku e yudansa a inkluí 19 mion dòler pa forsanan di Guaidó por komuniká safe, plaka pa gastunan di biahe, kapasitashon den preparashon di presupuesto entre otro komo un forma di preparashon pa goberná si oposishon logra desplasá Maduro di poder.
Trump a kritiká e gobièrnu venezolano indikando ku e ta wardando riba e dia ku “Venezuela ta wòrdu liberá pa libertat reina den e hemisferio kompleto”. El a agregá ku sosialismo ta “daña nashonnan” i destruí sosiedatnan”.
