WASHINGTON, AP. – Merka i Israel a firma un akuerdo nobo di yudansa ku ta duna forsanan israelí 38.000 mion dòler den 10 aña. Esaki ta e akuerdo mas grandi den su tipo ku Washington a firma ku un pais. Asina a wòrdu informá djárason.
Despues di vários luna di negosiashon, e akuerdo a wòrdu firmá djárason den departamento di estado di Washington.
E yudansa total ta di 3.800 mion dòler anual. Esaki ta un oumento di e 3.100 mion entregá pa Merka na Israel anualmente bou di e akuerdo aktual di 10 aña, ku ta kaduká na aña 2018.
Bou di e akuerdo nobo, e kapasidat di Israel di gasta parti di e fondonan riba produkto militar israelí ta wòrdu eliminá gradualmente, i eventualmente ta rekerí pa tur fondo wòrdu gasta riba ekiponan militar merikano.
E preferensia di Israel di gasta e fondonan internamente tabata un opstákulo di e akuerdo.
