CABO SAN LUCAS, MEXICO, AP.- Orkan Lorena tabata aserkando Los Cabos, kaminda e propietario di botonan a saka esakinan for di awa. Diferente turista a bai skonde na nan hotèl i polis i sòldatnan a registrá barionan pober pa buska refugio na un lugá safe.
E spesialistanan a pronostiká ku e wowo di e orkan lo pasa riba òf serka di e ekstremo di e península di Baja California, ku bientu fuerte i awaseru torensial. E habitantenan, kende a superá vários orkan anteriormente, a sòru pa prepará bon.
Outoridat di Los Cabos a bisa ku 787 persona a wòrdu transportá pa 18 refugio. Forsa di seguridat lokal a pidi e habitantenan ku ta biba bou di nivel di laman pa bandoná nan kas na Cabo San Lucas.
Lorena a haña forsa anochi i bira un orkan di kategoria 1 durante djabièrnè mardugá, segun informashon di Sentro Nashonal di Orkan di Merka. Outoridat a registrá bientu di 120 kilometer pa ora djabièrnè atardi, i e orkan tabata 55 kilometer leu, yegando Cabo San Lucas ku 10 kilometer pa ora. Meteorólogonan a pronostiká bientu, inundashon i laman brutu i peligroso den e península kompleto.
