MADRID (AFP).- Polis spañó a anunsiá e detenshon na Barcelona di un miembro importante i ruman dje lider di e organisashon kriminal venezolano Tren de Aragua, ku e último añanan a krese rápidamente na e kontinente amerikano.
E detenido, riba kende tin un òrdu internashonal di detenshon emití pa outoridatnan venezolano, tabata buská pa su “supuesto partisipashon den delitonan di terorismo, tráfiko di sernan humano, tráfiko di arma i ekstorshon”, segun Policia Nacional spañó a bisa den un komunikado.
E tabatin “un posishon destaká” den e struktura dje organisashon i ta “ruman dje lider na nivel mundial”, segun polis ta bisa mas aleu.
Riba pregunta di AFP, Policia Nacional no a duna su identidat, pero medionan venezolano a identifik’é komo Jason Roberto Guerrero Flores, ruman di lider dje grupo, Hector Guerrero Flores, alias “Niño” Guerrero”.
E sospechoso a keda lokalisá na Barcelona pa un unidat di Policia Nacional kreá spesífikamente pa investigá e posibel kresementu di Tren de Aragua na Spaña. Ta trata di un grupo kriminal ku a sali for di e sindikato di obreronan ku tabata traha den konstrukshon di un ‘railway’ na Venezuela”, for di ei e nòmber, segun ta splika den komunikado.
Ministerio públiko chileno ta responsabilisá e grupo aki di asesinato na Chile dje militar venezolano retirá Ronald Ojeda, disidente di gobièrnu di Nicolas Maduro na Venezuela i ku tabata biba komo refugiado den e pais suramerikano.
For di 2018, Tren de Aragua a ekspandé hopi lihé den kontinente amerikano introdusiendo tráfiko di migrantenan den áreanan di frontera di vários pais, manera ta e kaso ku Colombia, Perú, Chile i algun otro.
