MOSKU (AFP).- Ofisinanan di votashon a habri den e parti ekstremo ost ruso dunando inisio na un elekshon presidensial ku lo dura tres dia, den kua Vladimir Putin, na poder ya pa 24 aña, ta buska un mandato nobo.
E elekshon a start na e península di Kamchatka, den ost dje pais, i lo konkluí djadumingu na Kaliningado, un enklave ruso meimei di paisnan di Union Europeo.
E abitantenan dje parti ost a kuminsá vota ora ku abitantenan dje parti wèst dje pais tabata prepará pa bai drumi. E votashon lo tin un durashon di tres dia, inkluso den teritorionan okupá pa Rusia den Ukrania i Transnistria, teritorio separatista pro-ruso di Moldavia.
E mandatario a hasi un yamada riba su kompatriotanan pa “no desviá di kaminda” i pa ekspresá nan mes den elekshon, den kua no tin ningun otro polítiko di peso.
Putin, na poder for di aña 2000, ta enfrentá tres kandidato kendenan no ta oponé na e ofensiva militar den Ukrania ni na e represhon kontra di kualke tipo di oposishon, manera a keda demostrá ku morto den prizòn medio febrüari dje prinsipal retadó di Kremlin, Alexei Navalni. Outoridatnan a papia di morto natural, pero oposishon ta denunsiá su asesinato.
E úniko opositor real ku a purba na presentá su mes komo kandidato, Boris Nadezhdin, a keda blòkiá pa e komishon elektoral.
E biuda di Navalni, Yulia Navalnaya, ku ta biba den eksilio i a hura di lo sigui su lucha, a hasi un yamada na rusonan pa vota pa kualke kandidato ku eksepshon di Putin. Kasánan di sodanan ruso mobilisá den Ukrania, ku ta reklamá nan regreso, a uni nan mes na e yamada.
Pero ningun hende ta duda den re-elekshon di Putin, ku por keda na poder te 2030 i, despues di un reforma konstitushonal, por bolbe presentá su mes pa sigui na kabes dje pais te 2036, na momento ku e tin 84 aña.
Ministerio públiko di Mòsku a atvertí ku lo no tolerá ningun tipo di akshon di protesta durante dje dianan di votashon
