DACA, BANGLADESH, AFP.- Míles di persona a partisipá den un protesta kontra Fransia i produktonan di e pais den kapital di Bangladesh, despues ku presidente Emmanuel Macron a defendé publikashon di e karikaturanan di profeta Mohammed.
E diskurso di e mandatario franses, defendiendo publikashon di e karikaturanan despues ku un profesor a keda dekapitá pa mustra e karikaturanan den lès, a kousa un ola di protesta den paisnan musulman.
Vários a kima retrato di e presidente franses den Siria i na Libia e manifestantenan a kima bandera di Fransia. Qatar, Kuwait i otro paisnan den e Golfo Árabe a saka produktonan franses for di merkado.
Polis a kalkulá ku mas di 40.000 persona a uni un marcha organisá pa Islami Andolan Bangladesh na Daca, un partido islamita importante den e pais. Outoridat a para e protesta promé ku esakinan a avansá i yega e embahada di Fransia den e siudat.
Un islamita a dekapitá profesor Samuel Paty kende a mustra karikaturanan di Profeta Mohammed den lès. Esaki tabata e mesun dibuhonan publiká pa e revista satíriko Charlie Hebdo ku a motivá un atake terorista lagando mas di 12 persona morto den 2015.
